ABAA NA SI TYONG JUAN
Abaa na si tiong Juan
nagtanom nin niyog
nagsanga nin apnik
nagdahon nin ogob
Namurak biriran
namunga nin lukban
kaso koonon ni tiong Juan
hinog na latondan.
Ako An Lalaki
Ako an lalaki
labi ka pusoan
minsan an talapang
dai natatakotan
igwang magkiniskinis
sa gilid nin dalan
minalukso ako
golpe an dalagan.
Ako an lalaki
sa kawayan tubo'
dating namamari'
sa kamoteng luto'
aki pa man ako
na makisumaro
kumakan nin bahaw
dai napapaso'.
AKO HABONG GAYO
Kaya ako habong gayo
Kan lalakeng palikero,
Aldaw banggi sa tinampo
Kairiba kan soltero.
Minsan ako pagluhudan
Pagmisahan oro-aldaw
Dai nanggad mapakasal
Kan solterong parasugal.
Parasugal, parainom,
Kun dai na nin kakanon,
Sisipaon pati koron.
Ibang Bersyon
AKO HABONG GAYO
Ako si Señorita
Magayunon na daraga,
Daing gibo magpagayun
Ta mayo pang kailusyon.
Minsan mo akong luhudan
Sa altar, pagnobenahan
Dai ako mapakasal
Sa sulterong paralakaw.
Parasugal, parainom,
Para bugbog pa ki agom,
Paguli mayong kakanun,
Sisipaon pati koron.
AN DAGHAN MO NENENG
Na kun tal an tanga na dai nin kalag
nangahas domolok sa hamot nin burak
ako pa daw ining sangkap nin potencias
an dai domolok sa pakimaherak.
Na kun tal an asin na sa tubig gikan
tubig man giraray an natutunawan
na kun tal an dagat bago hararomon
nasosondalisa nin mga madunong.
An daghan mo neneng hababang paghilingon
dai ko maaraman kun ano an yaon
na kun tal an puso an may kasakitan
puso man giraray an makakaomay.
An Tingog Ni Nanay
Ay, napakapait daing kabarang
kun dai nin ina na mag'aataman
daghan ni nanay kun sinasandigan
sa larolaylay aki matorogan.
Hoyop nin doros na malipoton
an nagpapananok kan katorogan
huni nin gamgam mapongaw dangogon
tingog ni nanay an nagpapagiromdom.
Ano Daw Idtong Sa Gogon
Ano daw idtong sa gogon
Garong bulawan paghilngon
kasu sakuyang dulokon
Ay, ay burak palan nin balagon.
Kasu sakuya nang kiku-a
Sarong tingog an nagsayuma
Hari man ako pagkuaha
Ay, ay burak ako ni Maria.
Si Maria garo bulan
Si Kristo garo bulawan
Isamno ko pa sa altar
Lolay, Bitoon sa kalangitan.
Awit Nin Parasapna'
May gitara akong langka'
dara ko sa pagsapna'
kun aboton akong tungka'
togtogon kong punga'punga'
May gitara akong og'og
dara ko sa paglabog
kun aboton akong linog
togtogon kong kilogkilog.
Gitara Kong Tabog
May gitara akong tabog
daradara ko sa paglabog
pakahiling ko nin talosog
togtogon kong pasibogsibog
Halangkaw Na Langit
Halangkaw na langit
ano na ining sakit
Na sakong inabtan
Ay, orog kapait!
Marhay pang halean
Halean nin buhay
Ika asin ako
Sa kotkot magdamay!
Igwa Akong Singsing
Igwa akong singsing
may tampok na pula
itinao sako
kadtong taga-Naga
isinusu'lot ko
nagpapara nganga
kaya palan, tatay
ta gustong umiba.
Igwa akong singing
may tampok na itom
itinao sako
kadtong taga-Bombon
isinusu'lot ko
nagpapara modong
kaya palan, tatay
ta gustong mag'agom.
Igwa akong singsing
may tampok na puti
itinao sako
kadtong taga-Buhi
isinusu'lot ko
nagpapara hibi'
kaya palan, tatay
ta gustong magpapadi'!
Igwa Akong Singsing
Igwa akong singsing
singsing na brilyante
itinao sako kan taga-Legazpi
kaso iuli ko habo nang umagi
ay palan poon ko ta mamalaye.
Igwa akong singsing
singsing na perongko
itinao sako kan taga-Tabaco
kaso iuli ko habo nang umako
ay palan poon ko ta mag'aagom sako!
INING KALIBANGBANG
Ining kalibangbang makuri an lipungaw
Sa tangod nin burak naglalayawlayaw
Pusong nagtitios asin nanambitan
An hamot mo, Jazmin, sa puso kong nakaomay
An hamot mo Jazmin, abaa na
Sa pusong may sakit nakaranga
Kaya sa limpoy mo ako pasironga
Tibaad mahali an sakit ko
Na pinagtitios haloyon na
Akong sinikwal mo lugod gadanon na.
Luhang Mapait
An sakong kaulay-ulay,
Kun dai ika nakikita
Na sakong kahampang
Minsan nagtuturog
Sa ogmang pinangangaturogan,
Pigtitios ko man giraray,
An simpil nin tiunay,
nin lipongaw,
Madya mahamis na dahelan
Kaining sakong kasakitan
Oya ako naghahalat
Oya ining kadamay-damay.
Madya ta pagkukundimanan,
Sa linabyog nin duyan
Lalawgon mong langitnon.
na may kabinian.
MARASA PA BAYA'
Marasa pa baya namomòtan
Ta dai ka naherak
sako ngonyan
Neneng, marasa pa
Ta simong binayaan.
Maray pang mapara
Sa kinaban.
Pagkadaing palad
buhay kong iniho
akong namomoot
pinapabayaan.
Neneng marasa pa
Ta di mo naherakan
Maray pang mapara
Sa kinaban
May Gitara akong Pula
May gitara akong pula
dara-dara pag'eskwela
masabatan ko si maestra
tinogtogan kong pantomina!
Pasirosimbagan Nin Babae, Lalake
Lalake:
Señora kun habo kang gayo
ulian si sakong gasto
pagbabayo, pagsakdo
pagkua pa nin songo.
Babae:
Magsakdo ka man malibog
magsapna ka man malagtok
magkua man songo domog
magbabayo ka man binlod.
Ranga Nin Pusong Nagtitios
Ranga nin pusong nagtitios,
Burak na sangkap nin hamot,
Uya an buhay ko saimo dolot
Lilingya nin pagkaherak
Puso kong namomoot.
Bitoon kang maliwanag,
Sa diklom nin kabanggihan,
Puso kong nariribongan
Nagbareta nin kapungawan.
Kun dai kang pagkaherak
Na ako mo pabayaan,
Puso kong simong binihag
Magpapatimasang.
Uya an sarong bersyon na mas soanoy pa:
Ranga Nin Puso
Ranga sa pusong nagtitios
burak na sangkap nin hamot
uya an buhay ko simo dolot
lilingya nin pagkaherak
puso kong namomoot.
Bitoon kang masuriaw
sa diklom nin kabanggihan
magdalita mong tingrawan
puso kong nadidikloman.
Kun dai kang pagkaherak
na ako mo pabayaan
puso kong simong nabihag
ay mapapatimasang.
Sa Harong Kong Sadit
Dai ka matakot nena
Na sakong umiba
Sa harong kong sadit
Na togdok sa oma.
Ta duman nena
Kun kita na sana
An sakong kundiman nena
Paglalanyagan ka.
Kun kwasi pa sana
na ako mahimo
Mahamot na kadlom
na pambalogo mo
Diyan toktokon mo
An gapo na pino
nganeng mamate mo nena
Pagkamoot ko.
Si Manang Pulana
Si Manang Pulana nagsakat sa tuba,
Naloslos si saya, naheling si letra;
Kaso basahon ko c, o ko; c, a, ka;
Na kun bibilogon sadiri ta ka na.
Si Manang Pulana nagbanwit sa bobon,
Sinubadan pantat, kasiling binaton;
Kaso hapoton ko na kun anong pinaon;
Alolonting ogis na may golonggolong.
Saro, Duwa, Tolo
Saro, duwa, tolo
uya naman ako
apat, lima, anom
pirmeng sa giromdom
pito, walo, siyam
uya ka sa daghan
sampolo, maysaro
uya ka sa puso.
Salampating Guminaro'
Kaso sarong aldaw
Nag'ataman akong punay
Nakasangle, nakaribay
Nin si ogma ko kasakitan.
Salampating guminaro',
Guminaro huli sako',
Ano daw ikinamundo'
Ta naglayog nin harayo'.
Tuminaas, buminaba',
Nagturo' si sakong luha',
Nagin salog, nagin sapa',
Nagin danaw na dakula'.
Halat ka sakong punay ko,
Ta madakop ka nin iba,
Ilaog ka sa hawla
Sa hawlang may seradora.
Diyan ka na magdadanay
Ni pag'inom, ni pagkakan,
Tangani' ka nang magadan
Mapara' ka sa kina'ban.
Mag-post ng isang Komento